Davao City-Duna nay igong pondo ang gobyerno para sa pagpauli sa tanang mga OFWs gikan sa Guam kun ugaling man idayon sa North Korea ang ilang bahad nga bombahan ang pipila ka mga teritoryo sa Estados Unidos.
Sa interbyu sa media, gisulti karon ni Labor Secretary Silvestre Bello III nga gihatagan nila’g igong pagtagad ang mga pinoy nga naa sa abroad ug plastado na ang tabang para kanila sa panahon nga maipit sila sa kasamok.
Gibutyag ni Bello nga anaa sa kapin 100k ang populasyon sa mga OFWs nga nanarbaho sa Guam.
Kahinumduman sumala sa North Korea news nga atubangon nila ang mga banat og pagpanghuraw ni US President Donald Trump pinaagi sa laraw pagbomba sa Guam ug sa uban pang teritoryo sa Estados Unidos.
Gipasalig ni Bello nga dili pasagdan sa administrasyong Duterte ang tanang mga pinoy nga tua karon sa abroad labi na niadtong makulgot tunga-tunga sa mga kaguliyang.
Kasamang Aimee Guinita
