Magamay na lang ang mangin beneficiaries sa implementasyon sang Special Program for Employment of Students ukon SPES sang provincial government sang South Cotabato tungod sa Inter-Agency Task Force guidelines nga ginadumilian pa ang mga 21-anyos panubo nga maggwa tungod sa paandam sang COVID-19.
Suno kay Public Employment Service Unit Officer Flora Cavan base sa resulta sang ginpatigayon nila nga draw lots yara lang 81 ang 21 pataas nga amo ang mag-umpisa sang obra sa masunod nga semana nga implementasyon sang SPES.
Ginpahayag ni Maam Cavan nga ang mga taga-Koronadal ang magaumpisa sang obra sa Hunyo 15 tubtob Hulyo 7 subong nga tuig nga maasign sa mga opisina sang provincial government, samtang ang mga beneficiaries nga halin sa mga banwa ang magaumpisa sa Hunyo 22 tubtob Hulyo 24 nga maasign man sa mga barangay ukon sa munisipyo.
Apang magadepende naman sa sitwasyon suno kay Maam Cavan kon maakumudar pa ang mga SPES beneficiaries nga nagaedad sa 21-anyos panubo kag kon indi na pwede magakuha sila sa mga aplikante sadto anay nga nagaedad na sang 21-anyos pataas.
