Davao City – Nagpahimangno karon ang Davao City Anti-Scam Unit kalabot sa kwestionableng mga investment schemes karon sama niadtong mosaad nga adunay benepisyong makuha ang mga magpailawom kunohay sa hut-ong nga nag-adbokasiya sa federalism.
Sumala ni Anti-Scam Unit Head Ret. Maj. Simplicio Sagarino, Jr., adunay mga mipatim-aw sa ilang opisina nga nabiktima sa maong bag-ong scam nga nagtakuban ubos sa popular na karon nga federal movement.
Saysay ni Sagarino nga modus operandi sa maong scam mao ang kobransa nga P5,000 isip ‘Membership Fee’ diin sa maong kantidad, makabaton ka na og lote ug balay sa may Calinan area.
Gisusi sa maong unit ang naasoyng area nga anaa lamang nahimutang sa likod nga bahin sa usa ka iladong fast food chain diin ilang nadiskubrehan nga inay bakanteng yuta, pulos residential houses ang nagbarug na.
Dugang sa Anti-Scam Unit head nga ilang gipabalik ang mga complainants aron kuhaon ang pangalan sa gireklamong investment scheme operators / administrators apan wala na sila nagpakita pa.
Sa pagkakaron, padayong ginadawat sa anti-scam unit ang dugang mga nagareklamo kontra sa maong investment scheme sama niadtong taudtaud nang nagpamiyembro apan karon lamang naka-amgo ug naka-desidir nga mureklamo gani, mokabat na sa 2,546 ka mga reklamo ilang na-refer ngadto sa CIDG.
Gi-awhag usab karon ni Sagarino ang mga nabiktima ning maong investment operation nga mopatim-aw ug mo-reklamo aron makapasaka gilayon ang hustong kaso ug mahatagan og hustisya ang mga nahimong biktima niining maong binulay-og nga binuhatan.
RadyoMaN Jason Amisola
