Di angay nga mabalaka ang mga molopyo sa lungsod sa Compostela sa amihanang Sugbu sa gidagsa nga oarfish o “liwit” kagahapon atol sa kapistahan ni San Juan Baptismo .
Adunay mga patoo-too nga kung motunga ang dili kasarangan nga matang sa isda, nagpasabot kini nga adunay umaabot nga kalamidad sa usa ka lugar .
Apan ang regional director sa Bureau of Fisheries and Acquatic Resources-7, Alfeo Piloton niklaro nga way pagtoon nga nagmatood nga may koneksiyon sa pagtumaw sa kalamidad ilabi na linog ang pagpakita sa isda.
Gipasabot ni Piloton nga ang oarfish usa ka matang sa isda nga nagpuyo sa pinakailawom nga bahin sa dagat ug sagad mopaibabaw kini kung nadisturbo ang iyang pinuy-anan, nagmasakiton o kaha adunay kalit nga kausaban sa temperatura sa tubig ilawom sa dagat.
Ang oarfish nga adunay gitas-on nga halos 14 ka tiil napalgan sa daplin sa dagat sa Barangay Poblacion lungsod sa Compostela .
