General Santos City–Nagpadayag sa ilang pakigsimpatiya ang Bureau of Fire Protection Gensan sa pamilya ni Neceforo Palvinar human ang kamatayon niini sa disgrasya sa Barangay Calumpang.
Sa pakighinabi sa RMN-Gensan kang SFO1 Oliver Alfeche- tigpamaba sa Gensan Fire Office, gipadayag niini ang ilang pagpangayo og pasaylo sa maong panghitabo.
Gibutyag niini nga bisan dili intensyon ang panghitabo buot niyang ipakita ang ilang pakigsimpatiya sa pamilya tungod nawad-an sila og amahan.
Kalabot niini, dako ang pagpasalamat sa BFP Gensan tungod nasabtan sa pamilyang Pulvinar ang sitwasyon.
Gani makit-an man sa video natumba ang motorsiklong gimanehoan sa biktima ayha kini nadat-ugan sa ligid sa fire truck.
Dako matud pa kini nga pamatuod nga disgrasya lang ang nahitabo og walay bisan kinsa nga gustong makadisgrasya.
Giangkon usab ni SFO1 Alfeche nga ilaha nang gisugdan ang paghatag og suporta sa pamilya.
Gisaad niini nga full support ang ilang ihatag hilabina na sa pagpahiluna sa patayng lawas sa biktima.
Dili pa hinuon mabutyag ni Alfeche kung unsay mahimong status sa panarbaho ni SFOI Fuentes apan posible nga masayran kini sa sunod nga mga adlaw.(JB)
