VICTORIAS CITY – Naupos ang ginakabig tilipunan nga balay ukon ancestral house sang pamilya Bantug sa Osmeña Avenue, Barangay 1, Victorias City pasado la una kaina sang kaagahon.
Ginpahayad ni FO1 Stephen Pedrajas imbestigador sang Victorias Bureau of Fire protection nga padayon pa nila nga gina-usisa kun ano gid ang gintunaan sang amu nga sunog.
Sa karon indi pa mapalayag kun pila tanan ang balor sang mga nagkalaupos nga pagkabutang, nalakip dire ang mga malahalon nga paintings, antigo nga mga kagamitan kag mga laragway sang pamilya Bantug kag Palanca nga yara sa puluy-an.
Suno kay Pedrajas dako na ang kalayo sang sila nag abot bangud nagrespondi sila sa isa ka sunog nga nagluntad naman sa syudad sang Cadiz.
Apang nagapasalamat naman sila nga wala sang nasamaran sa amo nga insidente.
Sa Pihak nga bahin nagkasubo naman si Mayor Francis Frederick Palanca sang natabo bangud kabahin na sang iya pagdako ang amo nga balay.
Iya pa ginhanduraw ang ila pagtililipon labi na sa tion nga may okasyon ang ila pamilya.
Ginpabutyag naman ni Mr. Ray Bantug nga ang amo nga balay ginpatindog mismo ni anay Mayor sang Victorias nga si Remedios Bantug pagkatapos gid sang ikaduha nga giera sang inaway pangkalibutanon ukon sadtong tuig 1947.
Si Remedios ang lola na ni Congressman Albee Benetiz.
Ang balay ang himo sa kahoy kabangdanan nga madasig lamang ini nga ginlamon sang kalayo.
Sa karun wala pa sang nagakaigo nga plano kun bala liwat nga patindugan sang balay nga replica sa nasunogan ang lugar.
Magluwas sa balay may mga salakyan naman nga nagaparking nga nadalahig sa sunog apang wala pa nahibaluan kun pila ang kantidad sang mga nagkalasunog nga salakyan./Grace Supe
