Padayon nga ginapangita sang mga utoridad ang responsable sa pagbilin sang improvised explosive device nga nagsigabong kag nagresulta sang kamatayon sang isa ka motorista kag pagkapilas sang isa pa sa banwa sang South Upi, Maguindanao alas-6 sang aga sang Enero 26.
Sa imbestigasyon sang 57th Infantry “Masikap” Battalion kag South Upi Municipal Police Station, ang pagsigabong ang nagluntad malapit sa tower sang isa ka kumpanya sang telecommunication sa Timanan Public Market, Brgy. Romongaob, South Upi sa diin nakita ang isa ka biktima nga wala na sang kabuhi kag isa nga pilason.
Samtang isa pa ka IED ang nakit-an sa lugar sa diin natabo ang pagsigabong.
Ginkondena naman ni Joint Task Force Central Commander Major General Juvymax R. Uy ang nasambit nga insidente kag ginatudlo nga responsable ang Bangsamoro Islamic Freedom Fighters ukon BIFF group tungod sa signature sang IED.
Pahayag man ni Maj. Gen. Uy nga target man sang grupo ang local chief executive sang banwa nga si Mayor Reynalbert Insular nga mag-agi kuntani sa lugar agud magpadulong sa Barangay Kuya para sa pag-areglo sang isa ka problema sa nasambit nga barangay apang wala nadayon tungod sa insidente.
May-angot sini, ginahangkat ni Maj. Gen. Uy ang mga residente nga magreport kon may mga ginadudahan nga butang ukon personalidad nga mangin tunaan sang pag-atake sang terorista sa ila komunidad kag suportahan ang puwersa sang gobyerno para punggan ang kapareho nga insidente.
