BIFF gitudlong responsable sa pagpamomba sa South Upi Manguindanao

Maguindanao Province—Gipangita pa sa kapulisan ang responsableng mibilin sa improvised explosive device (IED) kansa mibusikad nga miresulta sa kamatayon sa usa ka motorista ug pagkaangol sa usa pa ka biktima sa South Upi, Maguindanao alas-6:00 sa buntag niadtong Enero 26.

Sa imbestigasyon sa 57th Infantry “Masikap” Battalion ug South Upi Municipal Police Station, ang pagbusikad nagluntad duol sa tower sa usa ka kumpanya sa telecommunication sa Timanan Public Market, Brgy. Romongaob, South Upi nga gikamatay sa usa ka biktima ug pagkasamad sa laing usa pa.

Samtang usa pa ka IED ang nakit-an sa lugar kung asa nahitabo ang pagbusikad.
Gikondena usab ni Joint Task Force Central Commander Major General Juvymax R. Uy ang maong insidente hain iyang gitudlo nga responsable sa krimen mao ang Bangsamoro Islamic Freedom Fighters kon BIFF group gumikan sa signature sa IED.


Pahayag usab ni Major General Uy nga target sa grupo ang local chief executive sa lungsod nga si Mayor Reynalbert Insular kansa gikatakda untang moagi lugar aron mahidangat sa Barangay Kuya aron aregluhon ang usa ka ka problema sa nasangpit nga barangay apan wala kini nahinayon gumikan sa maong insidente.

Kalabutan niini gihagit ni Major General Uy ang mga residente nga ireport sa tropa sa Militar o sa kapulisan kung aduna man galing may mga kadudahang butang o personalidad silang makit-an sa ilang lugar aron nga gilayon maaksyunan sa otoridad.

Facebook Comments