*Ilagan City, Isabela- *Arestado ang isang binata matapos mahuli sa pagnanakaw sa isang Ukayan dakong alas kwatro kaninang umaga, Enero 1, 2019 sa Brgy. Calamagui 2nd, City of Ilagan, Isabela.
Kinilala ang suspek na si Noel Bella Pasion, 19 anyos, residente ng Brgy. Calamagui 1st, City of Ilagan, Isabela, habang ang biktima at may-ari ng puwesto ay si Shiena Morandante Razo, 40 anyos, residente ng Brgy. Calamagui 2nd, City of Ilagan, Isabela.
Sa nakuhang impormasyon ng RMN Cauayan mula sa Isabela Police Provincial Office (IPPO), naaresto ang suspek matapos itong matiklo ng biktima na nagnakaw sa kanyang Ukay-Ukay stall kaya’t agad na humingi ng tulong sa PNP Ilagan.
Sa pagresponde naman ng mga pulis ay napag-alaman na unang pumasok sa isang grocery store ang suspek at nagnakaw ng mga grocery items.
Narekober sa suspek ang mga ninakaw na isang jacket, isang dash camera, mga susi ng motor kasama ang mga OR CR’s, Grocery items na nagkakahalaga ng P7,000.00, mga alahas na nagkakahalaga ng P30,000.00, at cash na nagkakahalaga ng P6,000.00.
Dinala na sa himpilan ng PNP Ilagan ang suspek kasama ang mga narekober na items para sa kaukulang dokumentasyon at disposisyon.
Samantala, sa huling panayam ng RMN Cauayan kay SPO1 Michael Bacani, imbestigador ng PNP Ilagan City, nasampahan na ng kasong Pagnanakaw si Noel Pasion.
