Bacolod City – Dakop sa ginpatigayon nga entrapment operation sang National Bureau of Investigation (NBI) paagi kay Special Agent William De Arca ang isa ka Bureau of Internal Revenue examiner nga si Julie Simpron-Hernaez.
Si Hernaez ang assigned sa Assessment Section sang BIR Revenue District 77 nga nahamtang sa Barangay Taculing, Bacolod City.
Sa interview sang dyHB kay NBI Bacolod chief Atty. Renoir Baldovino nga sang Marso 14, nagpadulong sa ila talapan ang tagreklamo nga si Genevieve Buenaflor sang JP Ramos Trading Corporation.
Suno sa NBI nagligad pa nga tuig nag-umpisa ang istoryahanay apang sini lang natigayon sang nagsugtanay nga P250,000 ang ibayad, 50% sa gobyerno samtang ang nabilin nga 50% magaserbe nga ‘PR’ sa empleyado.
Sa impormasyon nga nakuha sang dyHB, gindaho ni De Arca ang kwarta nga P25,000 kag tseke nga P100,000 sa parking area sang BIR kag sang nakasulod na sa iya opisina didto na ginhimo ang pag-aresto.
Nabulabog naman ang tanan, pati na mga taxpayers sang nagquestion ang mga gwardya sang BIR sa mga katapo sang NBI nga nagsulod.
Apang wala sang may mahimo ang mga ini bangod katapo sang NBI ang nag-operate kag entrapment ang natabo.
Gindala ini sa custodial facility sang NBI para i-inquest kag sa ulihi nakapyansa si Hernaez balor nga P100,000.
Sang nagbalik ang mga katapo sang NBI para sa pagkuha sang iban nga mga dokumento, pila sa mga empleyado ang nagsiling nga ginquestion ni BIR Revenue Region 12 Director Eduardo Pagulayan, Jr. ang sistema sang pag-aresto bangod may katuyuan ini nga ibutang sa kahuy-anan ang ahensya.
Sa karon wala pa sang official statement ang BIR sa insedente.
Una na ginpalayag ni Baldovino, nga graft and corruption ang iya priority sa iya pagpungko sa Bacolod kag Negros Occidental kag una nasampolan ang BIR. /dyHB Bacolod.
