January 29, 2019 Abo, Tigaon, Camarines Sur— Sa pagselebrar ni Arnie Fuentebella kan saiyang kompleanyo ngunyan na aldaw, Enero 29, an mga pasyente kan Tigaon Infirmary an saiyang papaogmahon sa pagbisita nya sainda asin pagtaong simpleng regalo packs.
An Tigaon Infirmary harani sa puso ni Arnie nin huli ta ini an saro sa mga enot niyang proyekto sa enot na termino kan saiyang pagtukaw bilang alkalde kan banwaan. Itinogdok an edificio sa Brgy. Caraycayon sa lote na pigdonar kan saiyang tugang na si DOE Usec. Wimpy Fuentebella asin ini nakumpleto kan taon 2011 sa tabang kan pondong itinao ni Senate Pres. Juan Ponce Enrile, Senador Loren Legarda, Jinggoy Estrada, Migz Zubiri asin iba pang mga donors.
Enot sa agenda kan aspirante para Kongresista na si Arnie an mairani sa kinapobrehan an kalidad na serbisyo sa salud. Sinabi ni Arnie na an mga health institutions na nagseserbi sa mga taga-Partido bunga kan maigot na pagmawot kan saindang pamilya na mas mapangatamanan an mga kahimanwang may kamatean.
Ngunyan, an Tigaon Infirmary igwa nin doktor na naka-duty 24 hours para magresponder sa mga emergency. Siring kan Manuel Fuentebella Memorial Hospital sa Sagnay, kinokondoser man digdi an Annual Surgical & Medical Mission na sa ngunyan nakapagserbi na nin 20,201 na pasyente poon pa kan 1998.
Padagos pang papakusogon ni Arnie Fuentebella an mga institusyon na pinagsakripisyohan na ipondar kan saindang pamilya poon kan sinda naglaog sa serbisyo publiko. “Kun may pagbabagong kinakaipohan sa Partido, ini an pagbabago pasiring sa mas asensadong buhay kan tao.” Dagdag pa ni Arnie, “Haloy nang may bagong Partido. Nakalatag asin nakatindog na an mga institusyon. Ang hamon na dapat atubangon iyo an pagsustenir kan pagtalubo kan mga ini para maihatod sa lambang harong asin pamilya kan Partido.”
