Ginapasalig sang bise alkalde sang Victorias nga talakayon nila sa Sangguniang Panlungsod ang duha ka petisyon nga ginpasaka sang miembro sang City Development Council (CDC) may angut sa P487 million nila nga loan sa bangko sang 2016 nga gastuhon kuntani sa pagpatukod sang bag-o nga government center.
Madumduman nga sa petisyon ni Ronaldo Germino, miembro sang CDC nga nagarepresentar sang transport sector, luyag sini mahibaluan kun anu ang natabo sa P487 million loan sa diin ang P350 million ang gastuhon sa pagtukod sang government center apang apat katuig na ang nakaligad, wala pa nasuguran ang kontruksyon.
Sa interview naman sang DYHB kay Vice Mayor Jerry Jover, ginpaathag sini nga na-atrasar ang pagtukod sang government center bangud ginhulat nila nga ma-convert ang masobra 21 hectares nga agricultural land sa commercial land. Suno kay Jover, aprubado na sa karun ang conversion sang duta, apang indi naman siya makakomento kun overpriced ang bili sang duta santo sa alegasyon ni Germino.
Sa interview kay Germino, ginpahayag sini nga santo sa iya nahibaluan, ang isa ka hectare nga agricultural land ang nagabalor lang sang P1.2 tubtob P1.8 million, baliskad sa pagbakal sang Victorias City nga P6.5 million per hectare.
Ginkumpirmar man ni Jover ang pagpadala sang sulat ni Mayor Wantan Palanca sa iya opisina may angut sa pag-withdraw sang P100 million nga time deposit sang ciudad sa tion pa anay ni former Mayor Severo Palanca. Suno sa bise-alkalde, talakayon pa man city council ang sulat ni Mayor Wantan kag diri mahibaluan kun anu ang mangin tikang sang konseho. Nagapasalig lamang si Jover sa ila pumuluyo nga hatagan nila pagtamod ang mga kaangay nga petisyon.
[image: image.png]
