Pabor si Negros Occidental Vice Governor Jeffrey Ferrer nga ipaiway lang anay ang isa sa pinakadaku nga event sa probinsya nga amo ang Panaad sa Negros Festival bangud sang threat nga ginatuga sang coronavirus disease (COVID-19).
Sa opinion ni Ferrer iya ginsiling nga mas importante nga mahatagan sang sabat kag makapangaman batuk sa amo nga virus sang sa dayunon ang amo nga kahiwatan.
Suno sa bise gobernador nga mahimo man ini gihapon nga mapatigayon sa masunod nga tuig kon mahagan-hagan na ang kaso sang COVID.
Nahibaluan nga ang Panaad sa Negros ang patigayunon kuntani sa April 20 tubtub 26 kon diin halos 80 porsiento na kuntani ang preparasyon nga ginpatigayon para sini nga kahiwatan.
Angut sini, plano na karon nga istoryahon ang mga alkalde sa probinsya agud kuhaon ang ila sentimiento kag opinyon angut sa ginaduso nga postponement sang Panaad Festival.
[image: image.png]
