Ginpasalamatan ni 6th District Board Member Valentino Miguel Alonso ang gilayon nga pagpatigayon sang contact tracing kag pag-lockdown sang city government sang Bacolod sa pila ka panimalay sa Purok Pine Tree, Brgy. Bata sa diin naga-arkila sang balay ang ika-18 nga COVID-19 positive sa ciudad.
Mierkoles nga adlaw sang naguwa ang resulta ni Patient 18 nga anay nagtrabaho driver kay Board Member Alonso. Sa interview sang DYHB kay Alonso, gin-athag sini nga indi nila family driver si Patient 18, apang nag-drive ini sa iya antis ang eleksyon. Suno kay Alonso, humalin sang nagsugod ang COVID-19, wala na naka-drive sa iya si Patient 18 apang nagligad nga Pebrero nakapalapit pa ini sa Provincial Capitol bangud may ginpadul-ong sa iya nga dokumento.
Nahibaluan nga gintugyunan ni Alonso si Patient 18 nga magpa-swab test sa provincial testing facility sa Teresita Jalandoni Hospital sa Silay City sang ini ang nagpanawag sa iya nga nagahingyo makabalik sa trabaho, bangud nahibaluan sang opisyal nga ini ang may ginabatyag.
Si Alonso kag iya asawa kag pila nila ka miembro sang pamilya ang nag-negatibo naman sa swab test. Samtang ang 32-anyos nga pasyente ang naka-isolate naman.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
