Garbo sa Cagayan de Oro amateur boxing team ang batan-ong boksidor nga si John Ignatius Macas kinsa nahimong kampeon sa 2019 Arafura Games nga gipahigayon sa Darwin, Australia.
Nakuha ni Macas ang gold medal sa men’s 49-52 kilograms category human niini gipildi ang kontra nga taga-New Zealand sulod lang sa duha ka round pinaagi sa referee stopped contest decision.
Matud ni Mr. Elmer Pamisa, ang head coach sa CdeO boxing team nga luyo sa kalampusan ni Macas, pakyas ang kaubang boksidor sa CdeO boxing team nga si Shera Mae Jacinto nga makahakot og medalya human kutob lang kini sa quarterfinal rounds sa women’s 48-51 kilogram category.
Si Macas ug Jacinto kauban sa delegasyon sa Philippine boxing team nga misalmot sa maong international competition didto sa Australia.
Ang Arafura Games usa ka multi-sport event diin nagtigi sa ilang abilidad sa 18 ka events ang dili mokabat sa 3,500 ka mga atleta gikan sa 30 ka nasud sa tibook kalibutan.
