Roxas City, Capiz- Ginkakugmat sang mga empleyado kag mga kliyente sang BIR-Capiz kag mga tenants sa Capiz Business and Government Center sa Brgy Tiza ang bomb scare.
Ini matapos nga nakabaton sang text message ang mga ini subong man isa ka sulat nga nagapahayag may yara sang nabutang nga eksplosibo ukon bomba malapit sa nasambitan nga mga building.
Bangud sini, ginpaguha ang mga tawo nga yara sa sulod antes nga ginkordon ang lugar samtang temporaryo nga ginpauntat ang mga transaksyon.
Diri ginpasulod ang K-9 dog kag bomb disposal team para nga tsekyaron ang lugar.
Makaligad ang halos isa ka oras, gindeklarar sang mga otoridad nga “cleared” ang duha ka mga building kun sa diin wala sang components sang paghimu sang eksplosibo ukon bomba nga nadiskubrehan ang K9-unit.
Maluwas sa Roxas City PNP, yara man nagresponde ang K-9 unit sang Philippine Coastguard, BFP-Roxas, CERT kag RCERT.
