Duha ka mga fireman ang nagbun-anay kag nagresulta sang kamatayon sang isa kag pagkasamad sang isa pa las 2 kaina sang kaagahon sa gwa sang fire station sa Purok Fire, Brgy. 8, Bacolod City.
Ginpahayag sang pulis nga ang biktima nga napatay amo si FO3 Isaac Cabana, legal ang edad samtang pilason naman si FO3 Cornelio Silva, legal man ang edad kag lunsay mga fireman sang Bacolod Bureau of Fire Protection.
Suno sa inisyal nga imbestigasyon sang Police Station 2 naghiwat sang ila Christmas party ang Bureau of Fire apang sang ulihi may nagluntad nga komosyon kag didto na nga nagbun-anay ang duha.
Pahayag pa sang pulis nga nag-angkon sang isa ka fatal nga pilas sa iya liog si FO3 Cabana kag gindala pa sa regional hospital apang ini ang gin-pronounce dead on arrival, samtang si FO3 Silva naman nag-angkon sang pilas sa iya tiyan kag padayon karon ginabulong sa isa ka pribado nga ospital.
[image: image.png]
