Moabot sa 19 ka mga contingents an entra kuman na tuig sa Bonok Bonok Festival,atul mismo sa bispera sa kapistahan sa syudad nan Surigao sa pagpasidungog sa Mahal na Patron,Sr. San Nicolas de Tolentino. Nalipay kuman an mga opisyales sa syudad sa pagpanguyo ni Mayor Ernesto Matugas sa kadaghan nan mga mientra kuman na tuig kay ini an pinakadaghan na mga partisipante sa milabay 34 ka tuig na pagpahigayon nan Bonok Bonok Maradjaw Karadjaw Festival . Tagbutyag pa sa Supervising Tourism Operation Officer nan Surigao City,Roselyn Merlin na arang na mga barangay gikan sa syudad,lakip mga eskuylahan an mientra kuman na tuig lakip an mga munisipyo sa Placer sanan Sison SDN, Cantilan Surigao del Sur, Villanueva,Misamis Oriental og Gingoog City.Kuman na tuig may papremyo sa Bonok Bonok Festival of Festivals Category na P500,000 para sa 1st Prize,P350,000 sa 2nd og P200,000 sa 3rd prize.Samtang sa Bonok Bonok Base Category may papremyo na P250,000,P200,000 og P150,000. Jauy isab tag P100,000 para sa mga non winning contingents lakip isab an mga Special awards na may cash prize pareho nan Best in Streetdancing,Best in Costume og Best Choreographer. Pareho sa milabay na tuig magsugod gihapon an streetdancing sa may ala una sa hapon og an showdown /programa alas tres sa hapon did on sa Provl. Sports Grandstand og libre an tanan sa pagtan-aw o saksi.
