Nagtiripon kan Enero 21, 2019 an mga suportadores kan Team Tato sa Caleb Center sa Diversion Road.
An guinibong pagtiripon katakod kan 24 aldaw na workshop kun saen an mga lideres kan mga 27 barangay sa Naga magkakaigwang directamentang mapartisipar sa paghaman kan plataporma de govierno kan *Team Tato*.
Afuera sa mga representate kan 27 barangay, an gabos na sector poon sa pinaka sadit makakabale man sa *bottom-up-platform-making activity*.
Sosog sa sarong staff ni Tato: “Ining klase nin pagguibo nin mga polisiya, paagi para ma-isentro sa pangangapudan kan tawo an plataporma; bakong kabaliktaran na an lideres an madesider kun ano an marahay para sa constituenes.”
An *bottom-up approach* sa paghahaman nin plataporma de govierno iyo an saro sa mga naging pundasyon asin legasiya kan liderato ni depuntong Jesse Robredo. Obheto kaini na makabale an
civil society pati an pinakasaradit na sektor sa proseso nin paghaman nin magkakanigong polisiya asin pagplano para sa Ciudad nin Naga.
Sa saiyang pampoon na mensahe sinabi ni *Tato Mendoza* na mawot niyang paluwason liwat an marahay na pag-govierno na nailubong na kan an eroplanong linunadan ni Robredo buminagsak sa kadagatan kan Masbate kan 2012.
Sabi man ni Mendoza, dakol nang salang guibo sa govierno ngonian asin an saiyang crusada iyo an mapaontok an mga ini nganing an mga Nagueños makakua liwat kan mga serbisyong maninigo para sainda orog na an silag na pakikipag transaksyon sa govierno, paninimbagan sa mga raot na opisyal, asin an pagpapakosog kan kapwa mga Nagueños.
Yaon man sa nasambitang pagtiripon iyo an mga miembros kan Team Tato na sinda Nathan Sergio, Areiz Macaraig, Badette Roco, asin Seling Tuason.
