Brgy. Baganihan nagpatabang sa lokal nga gobyerno sa nangadamyos nga kaumahan ug kalsada tungod sa landslide

Davao City- Nisumite na og report ang Barangay Baganihan ngadto sa lokal nga panggamhanan human sa gibiling damyos sa sagunson nga pag-ulan nga niresulta sa pagdahili sa yuta.

Sa interbyu sa DXDC kang Brgy. Baganihan Kapitan Arnold Angit, nangayo na sila’g tabang aron maayudahan ang mga apektadong mga pamilya kansang ang ilahang mga pananom ug produktong agrikultura nangadamyos tungod sa landslide.

Matud ni Angit, sa Sitio Kinawayan 19 ka mga households ang apektado samtang 4 ka mga households sa Sitio Puting Bato.

Samtang, nagpadala na og mga personahe ang City Engineer’s Office alang sa road clearing ug road gravelling lakip na ang pagbutang sa mga concrete culvert sa pipila ka mga kalsada nga dili passable gikan Sitio Maharlika, Sitio Pinangudlutan, Sitio Puting Bato ug Sitio Namnam tungod sa nahitabong landslide.

Segun sa kapitan sunod nga ayuhon ang naputol usab nga dalan sa may Purok 3, Sitio Katandungan.

RadyoMaN Aimee Guinita