Davao City – Sugdan ugmang adlawa Huwebes, Hulyo 8, 2021 ang pagpatuman sa Barangay Lasang, Davao City sa household tagging ug mapping sa ilang mga residente nga nabakunahan na batok Coronavirus Disease 2019 (COVID-19).
Sa interbyu sa DXDC RMN Davao kang Kapitan Allan Simo-ag sa Brgy. Lasang, gibutyag niini ang household tagging ug mapping usa ka inisyatibo sa barangay subay sa rekomendasyon sa Barangy Health Emergency Response Team (BHERT).
Gipasabot ni Simo-ag, tumong niini aron masayran kung kinsa na ang nagpabakuna sa usa ka panimalay diin adunay sticker nga ipapilit sa purtahan sa balay nga adunay nakabutang nga pangalan sa bakunado ug indikasyon kung kini 1st dose o 2nd dose sa bakuna.
Pinaagi niini, ma-monitor sa barangay kung pila ka miyembro sa pamilya, ang dili pa bakunado ug kung unsay rason nganong dili magpabakuna aron mapasabot pa sa nahisgutan kung unsa ang importansya sa pagpabakuna batok COVID-19.
“Part na siya sa among strategy nga para ma-identify namo kung kinsa pa ‘tong mga household nga walay bisan isa nga nagpabakuna para subject unya sa among pagpasabot og unsay rason nganong naay programa sa vaccination ang atoang gobyerno,” segun ni Simo-ag.
Dugang sa kapitan nga mag-agad na lamang sa City Government of Davao o sa ubang barangay kung ilang i-adopt ug ipatuman ang susamang estratehiya sa pag-monitor sa COVID-19 vaccination.
RadyoMaN Kirby Manzon
