Patay na ang usa ka British National human nalumos sa dagat sa Opol, Misamis Oriental.
Matud ni Police Major Ian Borinaga, Hepe sa Opol Municipal Police station nga ang biktima mao si Peter Jackson, 75 anyos, minyo sa usa pinay ug nagpuyo sa Zone 5, Barangay Igpit sa maong lungsod.
Gibutyag ni Borinaga nga nadala pa si Jackson sa Polymedic Plaza sa Barangay Kauswagan ning syudad sa Cagayan de Oro apan namatay ang biktima kagahapon sa hapon.
Basi sa imbestigasyon sa Opol Police station nga mga alas 12 kagahapon sa udto Pebrero 4, si Jackson nag-inusarang naligo sa dagat sa lungsod sa Opol apan nakit-an na lamang kini sa mga beachgoers nga naghigda daplin sa baybayon nga wala nay panimo-ot.
Gidala sa Opol rescuer sa ospital ang maong biktima apan wala na masalbar sa mga doktor ang iyang kinabuhi.
