BACOLOD CITY – Nasapwan nga bangkay na ang isa ka British national sang nagligad nga Sabado sang hapon, November 17 sa gate sang iya balay sa Celine Homes, Brgy. Estefania, Bacolod City.
Ginkilala ang biktima nga si Robert Edwards, 74 anyos ang edad, naghalin sa London England kag nagapuyo karon sa Celine Homes matapos may naka-live in nga isa ka Pinay.
Suno sa imbestigasyon sang Police Station 4, ang bangkay sang biktima ang nasapwan sang iya kaingud nga si Jaime dela Cruz nga nagahamyang na gid lamang sa gate sang iya puluy-an.
Nahibaluan nga ang biktima ang may ka live-in nga Filipina nga nakilala kay Erlina Advincula sa sulod sang 10 ka tuig apang ini ang yara na karon naga istar sa Escalante City.
Pinaagi sa tawag sa telepono, ginsaysay ni Erlina nga iya ginbayaan ang amo nga British bangud ini ang palahubog kag irresponsable.
Samtang, suno naman sa kaingud sang biktima, gin-sementuhan ni Edwards ang iya mga bintana kag nagsiling nga ang iya balay ang maga-serbe nga iya pantyon kon ini ang mapatay.
Sa karon gindala na sa isa ka punerarya ang bangkay sang amo nga British National kag ginahulat ang disposisyon sang iya anay ka live in kag sang embahada./dyHB BACOLOD
