DUMAGUETE CITY – Ara pa gihapon sa Siliman University Hospital si Edmund Sestoso, 51 anyos, ang anchorman nga ginluthang sang Lunes, las 10:30 sang aga sa Aldecoa St., Barangay Daro.
Si Sestoso ang nakaagom sang igo sang bala sa iya nga dughan kag tyan gikan sa .45 kalibre nga pistola.
Bag-o lang ini nakatapos sa iya programa sa 91.5 DYGB Power FM, nagsakay sa traysikol padulong sa iya boarding house, sang hana nga magbayad sang iya plete, gintiro ini sang riding-in-tandem.
Suno kay PSInsp. Fortunato Villafuerte, ginareview nila ang mga CCTV sa palibot para nga mahibaluan ang mga identities sang mga suspek.
Si Sestoso ang anay blocktimer kag tagdampig ni Governor Roel Degamo sang 2016 apang pagkatapos sang piniliay ini ang ginkuha sang Power FM nga radio commentator sa programa, ‘Patas, Balanse, og Kadangpan sang tanan’.
Ang Power FM sa Dumaguete, upod ang DYWC Radyo Bandilyo ang isa sa mga affiliates station sang RMN, Inc.
Ang Negros Press Club nga nakabse sa Bacolod City paagi kay Mr. Boy Duran, President, ang nagkondenar sa amu nga hilikuton sang mga tuyo mag-utas sang kabuhi ni Sestoso.
