CALATRAVA, NEGROS OCCIDENTAL – (3rd Update) Nag-abot na halin sa Manila kahapon ang iloy sang tatlo ka mga kabataan nga ginpatay sang ila man lamang mismo magulang sang nagligad nga Sabado, Hunyo 9, sa Brgy. Marcelo, banwa sang Calatrava.
Ginpahayag ni Brgy. Marcelo, Punong Barangay Jeremias Diotay nga nagpangabay gid ang iloy nga si Perla nga makita ang iya mga kabataan gani bisan tuman ka pigado, nagtinguha ini nga magpauli.
Suno kay Kap. Diotay nga nagbinuligay man ang mga opisyal sang barangay agud nga mahatagan sang lungon ang tatlo ka mga biktima nga ginpamatay.
Madumduman nga natabo ang insidente sadtong nagligad nga Sabado, June 9 sa Upper Pala-pala, Brgy. Marcelo banwa sang Calatrava kon diin pasado las 12 sang udto sang ginpamatay sang suspek nga si John Mark Melebo, 22 anyos ang iya mga manghod nga sanday Gregor, isa ka tuig ang edad, Alejandro, 5 years old kag Jhonrenz, 14 anyos ang edad.
Base sa imbestigasyon sang Calatrava Municipal Police Station, nagpauli sang udto sang Sabado ang suspek halin sa kampo kag nagpangakig ini sang iya nahibaluan nga wala sila sang palanyagahon.
Una niya nga nakita si Jhonrenz, gin-uyatan ang ulo kag ginlampos sa duta kag ginsundan sang pagduslak sa iya liog tubtub mapatay. Kaangay man sini ang ginhimo sang suspek sa duha pa gid niya ka mga manghod.
Pahayag ni Brgy. Captain Diotay nga ang pagkakilala sang iya mga kaingud sa suspek ang isa ka mabuot kag maalam nga bata, wala naga-inom kag wala man nagapanigarilyo.
Apang bangud posible sang problema sa pamilya partikular ang kapigaduhon kag ang liwat nga pagpamana sang ila iloy nga si Perla sa ila man lamang tiyo, wala na ini nasarangan pa sang suspek kag nagpamensar na ini sang indi ensakto.
Dugang pa sang punong barangay nga apesar maayo na istoryahon sa sulod ang selda ang suspek matapos niya ginhimo ang krimen, wala sila sang may nakita nga paghinulsol sa iya kag nagapabilin nga blangko.
Nahibaluan nga kahapon sang aga, las 6:30 nakit-an ang suspek sa ila man lamang mismo balay, nagpanago sa buho kag gintabunan niya sang lukay ang iya lawas, wala na ini nagbato pa kag nag-upod na lamang sa mga utoridad./ Jen Canoy photo
