Sarangani Province- Hugot ang nahimong pagpasalamat ni Maam Adelina Suemit *(su-mit)*, ang executive director sa N.C.C.A. kon National Commission for Culture and the Arts og maoy festival director sa Budayaw Festival, ang festival of culture, tungod kay nagmalampuson ang ilang kalihukan gitawag nga “outreach activity” nahitabo niaging adlaw nga Byernes gipahigayon sa tulo (3) ka mga munisipyo sa Sarangani Province.
Batyag matud pa sa mga performers sa Brunei Darussalam nga sila mga hari og reyna tungod kay layo pa lang gisugat na sila sa mga katawhan og kabataan sa lungsod sa Maitum bitbit ang flag sa Brunie, una pa man sila nakasulod sa nagpunsisok na nga Maitum Gym. Sa sulod nagpaabot si Maitum Mayor Tito Balazon.
Susamang paghulagway ang nahitabo sa Alabel. Nagpaabot ang mga residente sa paghidangat sa mga taga-Malaysia, kumpleto pa nga ni-abi abi kanila sila Mayor Nonoy Salarda, Vice Mayor Ronnel Español, og mga municipal kagawad.
Mao pud ang nahitabo sa Kalon Barak Skyline Ridge sa Malungon, anaa ang mainiton nga pag-welcome sa mga performers gikan sa nasud Indonesia, gipangunahan nila Vice Mayor Jun Escalada og mga konsehales.
Gitawag nga outreach activity tungod kay nangadto ang mga foreign performers sa mga munisipyo gikan sa main venue nga mao ang dakbayan sa Heneral Santos aron i-presenta ang nagkadaiyang kultura pinaagi sa pagtugtog og pagsayaw, samtang anaa pud ang mga taga-Sarangani nagpasundayag sa kulturang Sarangan og Pilipinhon.
Dungag ni Suemit, kung wala ang Sarangani Province, mamahimong kulang matud pa ang presentasyon sa Budayaw Festival.
Rason nga iya gayung gidayig si Governor Steve Chiongbian Solon tungod sa pag-uyon nga mahitabo kini sa Sarangani, og ngadto na usab sa kapikas sa kinabuhi sa gobernador nga si Miss Michelle Lopez Solon, ang nangulo sa Provincial Tourism Council.
Si Director Suemit ang taga-Davao City maong antigo mag-Bisaya.
Sa bahin ni Governor Solon, gibutyag niini nga dakong dungog ang pagkapili sa Gensan og Sarangani nga maoy lokasyon sa pinakauna nga Budayaw Festival, nga nahuman kagahapon. Ang sunod nga Budayaw ang mahitabo tuig Dos Mil Dise-nwebe (2019) na, pilian pa kung sa Indonesia, Malaysia o Brunei.
