Gindagdagan sang 60-day preventive suspension ni Negros Occidental Governor Eugenio Jose Lacson ang Provincial Budget Officer kag Manager sang Mambukal Resort.
Sa interview sang DYHB kay Provincial Legal Officer Roberto Nellas Jr., gin-confirm sini nga kahapon nga adlaw sang gin-serbe ang suspension order batok kay Provincial Budget Officer Percival Salado kag Ellen Marie Jalandoni nga manager sang Mambukal Resort. Suno kay Atty. Nellas, may kaangtanan sa ila tagsa ka trabaho ang rason sang suspension ni Salado kag Jalandoni apang wala na ini nagdetalye pa kag nagpanugyan nga hulaton nga matapos ang imbestigasyon.
Gin-athag naman ni Atty. Nellas nga ang preventive suspension, ang kabahin lamang sang tikang sang provincial government para sa imbestigasyon nga patigayunon kag samtang suspendido si Salado kag Jalandoni, indi sila makabaton sang sweldo kag indi man sila pwedi nga makapalapit sa provincial capitol building.Gin-confirm man ni Atty. Nellas nga may yara man sang ginpapanaog nga show cause order batok kay Ma. Mina Pellejo sang Negros Occidental Comprehensive Health Program (NOCHP).
Samtang indi pa ma-confirm ni Nellas kun may yara man sang show cause order batok kay Tina Basa Orbecido sang Negros Occidental Language and Information Technology Center (NOLITC) kag Karen Dinsay, nga head sang Negros Occidental Scholarship Program Division.
[image: image.png]
