LOCAL REVENUE SA BUTUAN NIKUNHOD- 2021 BUDGET MAS UBOS UG 25%
Nakatutuk karon ang Sangguniang Panlungsod sa dakbayan sa Butuan sa pagtoon alang sa 2021 Budget sa local nga kagamhanan sa dakbayan ubos ni Mayor Ronnievic Lagnada.
Gipaningkamotan karon sa Konsehal pinaagi sa Committee on Appropriations nga sa sunod buwan sa Disyembre mapasar na ang budget nga gamiton sunod tuig.
Apan gibutyag ni City Councilor Atty. John Gil Unay, Sr nga mas ubos ug 25% ang pundo alang sa tuig 2021 kun ikompara karong tuiga gumikan kay nikunod ang mga local revenues ug daghan usab sa mga koleksyon sa buhis ang wala makolekta sa LGU karong tuiga tungod sa pandemya nga dala sa COVID 19.
Nakaapekto sa koleksyon sa LGU Butuan ang dul-an sa 300 ka mga establismento nga nagdeklara ug permanent closure sa ilang patigayon.
Wala usab gipugos sa LGU ang koleksyon sa buhis sa tanang patigayon tungod kay gisabot sa kagamhanan ang kalisod ug krisis nga nasinati sa mga negosyante.
Aminado si Konsehal Unay nga possible maapektohan ang mga programa ug proyekto sa LGU Butuan sa sunod tuig gumikan sa pag-ubos sa budget apan adunay gipalabang nga ordinansa ang Konseho nga ipaubos sa ‘public auction’ ang tanang nabawi nga kabtangan sa goberno kung asa gibana-banang moabot sa kapin P25 Milyon pesos ang kita niini ug maoy itapak sa nikunhod nga budget alang sa sunod tuig.
Pinaagi sa ordinansang gipalabang prayoridad gihapon ang orihinal nga tag-iya sa nabawi nga kabtangan nga subling paliton kini human gibawi pabor sa LGU.
