*General Santos City— Nagpabilin gihapon sa 4milyones ka pesos ang gigahin nga budget sa lokal nga panggamhanan alang sa 2019 Tuna Festival.*
*Sumala kang Leonard Flores, labaw sa City Economic Management And Cooperative Development Office kon CEMCDO nga gamay kayo ang maong kantidad para sa usa ka dakong festival.*
*Apan ilaha matud pa kining gihimuan ug pamaagi aron nga magpabiling nindot ug engrande ang maong aktibidad alang sa katawhan sa dakbayan ug mga bisitang gikan sa mga kasikbit nga lugar.*
*Samtang gi-angkon ni Chiklet Rillo, festival director sa tuna festival nga 45 lang kaadlaw ang ilahang preparasyon alang sa maong aktibidad rason nga dili sama kaniadto nga usa ka bulan ang pagsaulog sa tuna festival.*
*Saysay niya nga gumikan sa mubong panahon nga preparasyon anaa lang sa usa ka semana ang selebrasyon nga magsugod sa Agosto 29 hangtud na sa Setyembre 5.*
*Apan gipaniguro niya nga sulod sa usa ka semana, masaksihan ang mga nindot nga mga aktibidad ug mapuno sa katawhan ang oval plaza kung asa himuon ang mga main event.*
*Nagpabilin usab ang mga aktibidad sama sa float parade nga sundan sa engrandeng opening sa Agosto 30 ug ang sugbahan sa dalan ga himuon sa Setyembre 4 dungan sa RMN Fiesta watch samtang anaa usab ang engrandeng closing ceremony.*
