Igo pa ang nahibiing bugas sa National Food Authority kon NFA hangtod sa ikaduhang ka semana sa bulan sa Mayo ning tuiga.
Una nang gibutyag sa NFA nga anaa na lang sa 1,500 kapin kon kulang ka sakong bugas ang nahibilin sa ahensiya ug wala na sila nagpagawas sukad kaniadtong Marso 31, 2018.
Ang maong mga bugas gigahin alang sa BJMP, PSWD, Provincial Hospital, Red Cross ug alang sa mga apektado sa kalamidad.
Sa interview sa RMN Malaybalay ngadto kang Gil Tabor, ang provincial manager sa NFA-Bukidnon gibutyag niini nga gihimo ang government to government scheme sa pag-import sa bugas ug gibana-banang muabot ang mao nga mga imported rice sa 25 hangtod 30 ka adlaw.
Matud ni Tabor nga dili makalihok ilang kadumalahan sa NFA tungod sa NFA Council ug karon nga ipa-demolish kini ni Pangulong Rodrigro Duterte, makahimo na matud pa sa kaugalingon lakang ug desisyon ang buhatam.
Apil matud pa sa ilang gisugyot kaniadto pa, ang pag-usab sa presyo sa pagpalit sa mga mais ug humay sa mga mag-uuma nga gikan sa 17 ka pesos himoon kining 22 ka pesos aron makabenepisyo ang mga mag-uuma apan napugnga kini tungod sa NFA council.
Gipasabot niini nga dugay na kaayo ang 17 pesos nga nilungtad na sa halos 10 ka tuig.
