Gin pa-recall na ni Punong Barangay Leah Beri sang Barangay Tanza banwa sang E.B Magalona ang bugas nga ginpanagtag sang barangay nga ginreklamo sa DYHB sang netizen nga lagum kag may baho para ma ilisan.
Ginpahayag ni Beri sa DYHB, may yara sila 50 ka sako sang bugas nga gin bakal ang barangay halin sa ila calamity fund sa syudad sang Bago para nga idugang sa ginhatag sang banwa para nga ipanagtag sa pumuluyo nga ma apektuhan sang enhanced community quarantine.
Iya man ginklaro nga wala sini mahibaluan nga kun lagum gid man kag may baho ang amo nga mga bugas matapos nga gin repack sa tag lima ka kilo.
Sa karon gina libot na sang BHW kag barangay staff ang mga puluy-an nga napanghatagan na para ma ilisan sang wala baho nga bugas kun may yara gid man.
Pwede man nila madala sa barangay hall para ma islan.
Samtang, ginklaro man ni Mayor Marvin Malacon sang nasambit nga banwa sa DYHB nga puti kag maayo nga klase ang bugas nga gin repack sang banwa para i-distribute sa mga barangay kay siya mismo ang naga supervise sa pag preparar sini kag pagpamutos sang amo nga mga food packs para sa mga pumuluyo.
Dugang ni Malacon nga kun may yara man gid sang kasubong nga reklamo, mag derecho lang sa iya opisina para mahatagan sa gilayon sang solusyon.
[image: image.png]
