Igo palang mipatong sa 17.14% ang kompletong nabakunahan batok Covid-19 sa target nga populasyon sa probinsya sa Bukidnon.
Kini basi sa report nga gipagawas sa Provincial Health office kagahapon.
Anaa sa 183,150 ka mga indibidwal ang kompletong nabakunahan, layo pa sa ginatarget nga ihap aron nga makab-ot ang herd immunity sa tibook probinsya.
Miuna sa Bukidnon ang munisipyo sa Sumilao sa 23.82% nga nabakunahan, gisundan sa Malitbog sa 23.13%, Malaybalay City sa 22.33%, misunod ang Manolo Fortich sa 22.32% ug ikalima ang lungsod sa Kibawe sa 21.70% sa target nga populasyon ang nabakunahan.
Dako usab nga nakitag kausaban ang paghatag og mga insentibo ngadto sa mga magpabakuna. Kini ang nakitang epektibong pamaagi nganung miuna ang lungsod sa Sumilao.
Sa pikas nga bahin, malaumon ang mga opisyales sa probinsya nga madani sa mga tagsa-tagsa ka mga munisipyo ilang katawhan sa pagpabakuna. Ilabi na nga pagasugdan na sa Oktubre sunod bulan ang pagpamakuna sa kabataan.
