Anaa na sa 36 ang kinatibuk-ang ihap sa kumpirmadong kaso sa COVID-19 sa probinsya sa Bukidnon as of July 7, 2020.
Kini human nga nadugangan pa ug usa ka kumpirmadong kaso sa mao nga virus nga taga Valencia City.
Nasayran nga natala kagahapon, ang ika-4 nga kumpirmadong kaso sa COVID-19, sa lungsod sa Don Carlos, Bukidnon.
Sa COVID-19 confirmed case update sa IATF – Don Carlos, gipahibalo niini ang ika-upat nga kumpirmadong kaso sa covid-19. Usa kini siya ka- LSI (locally-stranded individual), gikan sa Malabon City, 33 anyos ang panuigon, babae.
Ang maong LSI adunay asthma. Nakasinati kini ug pag-ubo sulod sa usa ka-semana, pero walay plema ug hilanat.
Hulyo 4, 2020, 7am, gidala siya sa BPMC para sa RT-PCR o swab test.
Gibalik siya sa mao nga lunsod sa ilang Ligtas Covid Center para magpadayon sa quarantine, samtang gapaabot sa resulta.
Hulyo 7, 2020, nadawat ang official result, diin nakabutang nga positibo kini sa COVID-19.
Sa kasamtangan, padayon ang gihimo nga contact tracing na nakasalimuha sa maong LSI gikan sa Malabon hangtod sa Don Carlos.
Samtang sa natala sa siyudad sa Valencia ang ika-5 nga kumpirmadong kaso sa COVID-19 ug kini usab ang ika-3 nga aktibong kaso sa mao nga siyudad.
Usa kini ka 41 anyos nga lalaki ug LSI nga gikan sa Sampaloc, Manila ug lumulupyo sa Brgy. Mailag.
Nigawas kagahapon ang resulta sa RT-PCR confirmatory test kung asa positibo kini.
Gipailalom na kini sa istriktong isolation sa Valencia City Central School isolation facility ug gipahigayon na usab ang contact tracing.
Kadtong mga naka-close contact sa mao nga pasyente nga nasuta, gidala na usab sa isolation facility para ma-monitor.
