General Santos City—nabulabog ang mga miyembro Civil Security Unit (CSU) nga nakabase sa Bulaong Terminal ingon man mga Vendor sa maong lugar human nakit-an ang usa ka Cellophane nga nakaplagan sa entrada nga bahin sa terminal.
Sumala ni Fedelito Masong, CSU, nga alas 3:00 sa kabuntagon kaganina dihang sila naalarma human nakit-an ang usa ka Cellophane nga gibilin sa maong lugar. Gilayon silang mireport ngadto sa Buhatan sa Explosive Ordnance Division nga nakabase sa Camp Fermin Lira.
Gilayon usab kining girespondihan ug nasuta nga sulod niini pulos nga baligya kansa gituohang gidisplay sa Oval Plaza atol sa Selebrasyon sa Tuna Festival.
Dungag pa ni Masong nga ayha nakaplagan ang Cellophane adunay mga nangagi nga Vendor nga gikan sa Oval Plaza kansa misakay sa bus padulong ngadto sa syudad sa Davao ug gituohang natagak lang ang maong Cellophane.
