Davao City – Giingong bullying ang gilantaw nga motibo sa pagdunggab – patay sa usa ka dalaga sa Sitio Bato, Brgy. Mamacao, Sta. Maria, Davao Occidental niadtong Disyembre 30, 2018, adlawng Domingo.
Sa pakighinabi sa DXDC RMN Davao kay PO1 Mae Mamac sa Sta. Maria PNP, giingon niining naglagot ang suspek nga si Wangkayu Tribunalo, 18 anyos ngadto sa biktimang si alyas Tin, 15 anyos ug pulos residente sa nasangpit nga lugar.
“Base sa imbestigasyon, ang motibo sa insidente kalagot sa suspek sa biktima… wala siyay gusto sa biktima, naglagot lang siya kay pirmi siya i-bully sa biktima unya napahiya siya atong adlawa tungod daghan nakadungog ug gikataw-an siya, didto siya na trigger pagka gabii na”, segun sa imbestigador.
Kahinumduman nga napalgang wala nay kinabuhi mismo sa sulod sa panimalay ang biktima nga nagkadugo na apan sumala sa pulis dili pa masuta og pila ka stab wounds ang naangkon gumikan naghulat pa usab sila sa medical sa doctor nga misuta sa patayng lawas sa dalaga sukwahi sa mga mikatag nga nakaangkon kini og kapin 20 ka mga stab wounds.
Dugang pagpaklaro sa Sta. Maria PNP nga base sa medico legal nga negatibo ang akusasyon nga gilugos ang dalaga.
Sa karon, balhug na sa prisuhan ang suspek human boluntaryong misurrender sa kapulisan samtang laumang ugmang adlawa ipasang-at ngadto sa korte ang kasong murder.
RadyoMaN Renz Barbarona
