Gimandoan ni City Police Director Col. Henry Dampal ang Chief of Police sa Station 7 sa Bulua nga palapdan ang ilang active surveillance silbing ilang walay sukod nga tabang sa administration ni Mayor Oscar Moreno sa kampanya batok sa Corona virus disease o COVID-19.
Matud ni Police Major Ivan Viñas nga Spokesman sa Cagayan de Oro City Police Office nga ang mando ni Dampal human nagpositibo sa Covid-19 ang usa ka lalaking taga Caraga Region nga unang nagpuyo sa Zone 12, Barangay Bulua sa wala pa kini mopauli sa ilang lugar sa Prosperidad, Agusan Del Sur.
Matud ni Viñas nga lakip sa mando ni Dampal nga kinahangal ang chief of police sa Bulua, makig coordinate sa mga health officials aron walay sagabal ang ilang covid-19 active surveillance.
Maoy tuyo sa active surveillance ang pagpangita sa mga residente sa Bulua nga nahimong Close Contact sa usa Covid positive Patient nga taga Caraga Region.
Sa pikas nga bahin, gimando-an usab ni Dampal ang traffic officials sa Cagayan de Oro nga i-istrikto gayud ang pagpatuman sa Bawal Angas sa motorsiklo.
-o0o-
