General Santos City— Giklaro ni Atty. Arnel Zapatos, City Administrator ning dakbayan sa Gensan nga sa pagpa-ilom sa syudad sa General Community Quarantine GCQ, dili una tugutan ang pagbayhe pasulod sa dakbayan sa mga bus ug van nga magdala ug pasahero nga dili apil sa mga exempted sa executive order 45 ni Gensan City Mayor Ronnel Rivera.
Nauna na matud pang gisuspendi sa LTFRB 12 ang mga special permit sa mga depampasaheruang sakyanan pasulod sa dakbayan hilabina nga dili lang ang Gensan ang naunang nagdeklara ug border lockdown kondili bisan na ang mga kasikbit nga probinsya.
Sa karon, ang tugutan lang gyud nga makasulod sa border mao ang mga adunay dalang essential goods sama sa pagkaon, ingon man medical ug ang mga essential workers nga nabutang sa EO45. Dugang pamahayag ni Atty. Zapatos nga ilalom sa Executive Order 112, ginahatagan ug katungod ang tanang mga Mayor nga ipailalom sa Zonal Lockdown ug lockdown ang tibuok syudad hilabina kung kini usa ka highly urbanized city kon HUC sama sa dakbayan sa Gensan.
Pagpaklaro niya nga ang ilahang ginatuman ang guidelines gikan sa nasyunal kung kanus-a lang pwede magdeklara ug GCQ o MGCQ ang usa ka lugar, apan ilaha usab ginatan-aw ang sitwasyon, hilabina karon nga nagkataas na ang kaso sa covid sa dakbayan.
Sa kasamtangang sitwasyon sa Gensan sumala niini nga dili matud pa pwede nga maghulat gihapon sa mando sa nasyonal gumikan anaa nalang sa 55 ang bed capacity sa panggobyernong hospital ug anaa na sa 92% ang ocupancy sa tanang hospital sa Gensan. (LVR)
