Davao City – Giangkon karon sa Davao City Anti-Drug Abuse Council (CADAC) nga 35 ka barangay sa dakbayan wala mag-perform ang ilang Barangay Anti-Drug Abuse Councils kun BADACs.
Gisulti ni CADAC Officer-in-Charge Reynaldo Rivera nga ang kakulangon sa programa ang rason nganong wala muarangkada kun nag-perform ang BADAC sa 35 ka barangay ning syudad.
Segun ni Rivera, ang pinakadaghang mga barangay sa dakbayan kinsa wala maglihuk sa kampanya batok droga sagad nahimutang sa downtown area.
Hinoon, nagdumili karon ang maong opisyal sa pagbulgar sa identity sa naasoyng mga barangay.
Dili usab buot ni Rivera nga hukman dayon ang maong mga barangay kun aduna ba’y mga opisyales nga protektor kun nahilambigit sa iligal nga droga maong wala mag-perform ang ilang BADAC.
Bisan pa man sa mga BADAC nga ‘non-peforming,’ malampuson gihapon sa pangkinatibuk-an ang giyera kontra droga tungod sa suporta sa LGU.
Mihimo na usab og lakang ang CADAC aron mapukaw ang mga barangay opisyales nga wala nagpakabana sa pagbuhi ug pag-aktibo sa ilang BADAC diha sa programa kontra droga.
Dugang ni Rivera nga si First District Councilor Pilar Braga nagduso na karon og ordinansa sa Konseho diin nagtagana nga kadtong mga opisyales nga pakyas sa pagsumpo sa droga, pagataktakon sa puwesto diha sa barangay.
RadyoMaN Joel Viray
