Subling gipakita sa mga boksidor sa Cagayan de Oro City amateur boxing team ang gikaintapang abilidad ug katakus ibabaw sa ring.
Kini human nahimong overall champion ang Team CdeO sa bag-ohay lang natapos nga Philippine Sports Commission-Pacquiao Amateur Boxing Cup National Championships 2018 didto sa Mandaue City, Cebu.
Matud sa Cagayan de Oro City Information Office nga pito ka gold, duha ka silver ug usa ka bronze medal ang nahakot sa CdeO boxing team sa maong national tournament.
Samtang, gibutyag ni Team Cdeo boxing head coach Elmer Pamisa nga nakontra sa mga boksidor sa syudad ang mga boxing teams gikan sa lain-laing lugar sa Luzon, Visayas ug Mindanao.
Ang pito ka gold medal naangkon nila ni Ailene Kaye Caranagan (girls flyweight), Alenne Althea Pores (girls light bantamweight), Elaide Pamisa (girls light flyweight), Mark Lester Durens (junior boys light flyweight), John Erl Palivino (junior boys flyweight), John Ignatius Macas (youth boys flyweight) ug John Paul Panuayan (youth boys lightweight).
Samtang ang duha ka silver medal nasakmit nila ni Kim Bryan Cabrillos (junior boys light bantamweight) ug Dave Bryan Caspe (junior boys bantamweight) ug ang usa ka bronze medal nakuha ni Jessa Laica Caranagan.
Tungod niining kalampusan, dako ang pasalamat sa boxing team sa syudad sa hugot nga suporta ni Mayor Oscar Moreno nga maoy nakapadasig kanila aron magmalampuson sa ilang pagsalmot sa matag kompetisyon.
