Gipahalipayan sa konseho ning syudad ang kagamhanan sa Cagayan de Oro tungod sa naangkong kalampusan sa natad sa edukasyon.
Kini human nahatagan sa Seal of Good Education Governance gikan sa Synergeia Foundation agig pag-ila sa gipatumang strategic innovations sa natad sa edukasyon.
Lakip usab niini ang pagpatuman sa mga programa alang sa de kalidad nga edukasyon sa mga tinun-an sa publikong tunghaan.
Nasayran nga nakuha sa Cagayan de Oro ang unang dapit ug ang ikaduhang dapit nakuha sa Valenzuela City ug wala nay lain pang highly urbanized city nga napasidunggan sa maong kalampusan.
Mipaabot sa ilang pahalipay ang konseho ngadto kang Mayor Oscar Moreno, sa mga sakop sa Local School Board, City Schools Division, komite sa edukasyon ug tanang ahensya nga nalambigit sa pagpatuman sa mga programa ug proyekto sa natad sa edukasyon.
Tungod sa maong kalampusan, ang syudad gigahinan sa Smart Communications ug PLDT sa 1.5 million pesos nga package alang sa education programs.
By: RadyoMaN Annaliza Amontos-Reyes
