By: Joanna Ricote
Gi deklara ubos sa state of calamity ang syudad sa Cagayan de Oro.
Kini atol sa gipahigayong special session sa konseho kaganinang buntag ubos sa pag dumala ni City Vice Mayor Raineir Uy.
Nasayran nga hiniusang gi uyunan sa konseho ang pag deklara sa state of calamity human nga na apektuhan ni bagyong Vinta ang syudad, kung asa gibaha ang pipila ka brgy sama sa Brgy. Carmen, Macasandig ug Brgy. Consolacion.
Gumikan niini, magamit na sa syudad ang 5% nga calamity fund gikan sa 5.8 billion pesos nga budget sa syudad alang sa tibuok tuig.
Mahinumduman nga niadtong December 22, 2017 dihang na-apektuhan ang syudad gumikan sa maong bagyo kung asa dali nga misaka ang level sa tubig sa Cagayan de Oro River, gumikan sa kusog nga pag bundak sa ulan sa bukiran nga bahin.
Samtang, temporaryong gipasirad-an sa syudad ang tulo ka mga tulay sa CDO, gumikan sa posibilidad nga pagkahugmo niini, tungod sa bul-og sa tubig.
Nasayran nga mi-awas ang tubig gikan sa CDO river, og midagayday padulong sa mga kabalayan nga nahimutang kilid sa maong sapa.
