Giduso na karon ug gipaningkamotan nga ipadali ang matud pa plano nga himoong ika upat nga metropolis ang syudad sa Cagayan de Oro. Kini matud pa ang nakaplano nga mosunod sa mga dagko ug malamboong syudad sa nasud sama sa Metro Manila, Metro Cebu ug Metro Davao.
Sa pinakaulahing session nga gipangulohan ni Vice Mayor Raineir Joaquin V. Uy, gisagop sa city council ang resolosyon nga nag-aghat sa National Economic and Development Authority(Neda10) ug Regional Development Council(RDC) nga pangulohan ang paghimo sa Metropolitan Cagayan de Oro.
Si konsehal Ian Mark Nacaya ang niduso sa maong resolosyon ug nga matud pa apil diay ang maong plano sa Philippine Development Plan kung (PDP) sa tuig 2017-2022. Kini nagpasabot lamang nga andam na ang administrasyong Duterte sa maong katoyoan ug planado na ang tanan para sa umaabot.
Subay niini gikinahanglan usab sa Cagayan de Oro ang mga silingan niining kalungsoran aron mahimong usa ka metropolis ug kini naglangkob na sa Jasaan, Villanueva, Tagoloan, Claveria, Opol, El Salvador, Alubijid, Laguindingan ug Gitagum. Apil na usab ang Libona, Manolo Fortich, Talakag, Baungon, Malitbog ug Sumilao sa probinsya sa Bukidnon.
