Davao City- Kasong Swindling ug Estafa ang na-file sa NBI ngadto sa City Prosecutor’s Office kagahapong adlawa batok sa scammer nga Canadian national giilang si William Smith, 40 anyos.
Kahinumduman nga nasikop si Smith sa gilusad nga entrapment operation sa pagpanguna sa Anti Scam Unit kauban ang pwersa sa NBI nahitabo sa Doña Vicenta Village niadtong miaging adlaw.
Sumala ni retired Police Chief Inspector Simplecio Sagarino sa Anti Scam Unit nga daghan na ang nabiktima sa dinakpan subay sa mga nagreklamo ug mipatala sa ilang buhatan.
Gidugang ni Sagarino nga ang tulo ka complainant ang mi-file og kaso human nakuhaan sa dakong kantidad nga cash ug ang uban sagad mga negosyante ang nabiktima.
Giingon ni Sagarino nga gihimo sa suspek ang modus pinaagi sa facebook transaction ug makigkita sa personal ug didto na niya ihanyag ang “double your money” nga negosyo.
Sa karon ang dinakpan anaa pa gikustodiya sa NBI XI.
Subling nag awhag si Sagarino sa mga nabiktima sa canadian nga mamahimong mo-file sila og kaso batok sa dinakpan.
RadyoMaN Don Pulayao
