Bacolod City – Padayon nga sarado ang Provincial Capitol Lagoon sa Bacolod City bangod sa nagapadayon nga renovation sang Ayala Land Inc. (ALI), ang developer sang mga propedad sang probinsya sang palibot sang Provincial Capitol. Ginapahayag ni Venchito Magalona, Capitol security chief, nga bisan mag-agi sa amu nga lugar ang ginadumilian man.
Suno naman kay Governor Alfredo Marañon, Jr. nga ang Ayala Land Inc. ang nagapatigayon sang total makeover sang lagoon sa budget naman nga P55 million sa diin kabahin ini sang kontrata sang Ayala Land sa provincial government sang ginabakal kag gin-arkilahan sini ang capitol properties.
Gindayaw man ni Marañon ang maayo nga plano kag desenyo sang Ayala, nga trademark na sang kompaniya humalin sadto. Ang lagoon ang ginsarado bangod dira nahamtang ang ila mga gamit kag may gina-install nga underground cable nga delikado naman sa publiko.
Mangin elevated na ang itsura sang lagoon sa diin ang fish pond ang paga-islan na sang bag-o.
Magluwas sa lagoon, padayon man ang pagtukod sang ALI sa ila hotel, condominium kag mall.
