Capizeño nga Seafarer, nagpositibo sa Delta(Indian) variant sang COVID-19!

15

Roxas City, Capiz – Ginkumpirmar ni Mr. Joeffrey Espiritu, Information Officer sang DOH- Capiz nga isa ka Capizeño ang nagpositibo sa Delta(Indian) variant sang COVID-19.
Sa interview sang DyVR RMN Roxas, ginsiling ni Espiritu nga ang pasyente ang isa ka seafarer. Nag-abot sa probinsya sang Capiz sadtong Hunyo 17, 2021.
Antes pa man nga nagpauli sa Capiz, ini ang nagpaidalom sa quarantine protocols sa Metro Manila kag ginkuhaan sang swab test sang Hunyo 6 kag nagpositibo sa wala pa mahibaluan nga variant sang COVID-19 virus.
Natapos sini ang quarantine period kag gindeklarar nga ‘recovered’.
Nagpauli sa Capiz ang amo nga persona sang Hunyo 17, 2021 via special flight sa Iloilo.
Apang sang nagligad nga Hunyo 18, 2021, nadiskubrehan nga Delta(Indian) variant ang nag-igu sa amo nga seafarer matapos nga ginpaidalom sa Genome Sequencing ang test result sini.
Bangud sini, ginpakamaayo sang Capiz Provincial Health Office(PHO) nga i-isolate anay ang nasambitan nga persona separar sa iya pamilya bilang pag-andam.
Nahibaluan nga base sa World Health Organization ukon WHO ang Delta variant sang COVID-19 nga una na-detect sa pungsod India ang ginakabig nga ‘fatal’ kag madasig ang transmission.
Base sa rekord sang Department of Health(DOH) as of June 21, 2021, nakabalhag na ang Pilipinas sang 17 tanan ka kumpirmado nga kaso sang Delta variant.

Facebook Comments