Tagpasabot kuman nan mga kadagkoan sa Dep’t of Transportation o DOTr sa Caraga region na nakabase didto sa Butuan City na dili lakip an region 13 o caraga region sa bag-o na piso o increase nan pamasahe sa mga jeepny ug multicab, human an 4 ka rehiyon sa nasod an tagtugutan nan Ltfrb na dugangan an ila pagpanukot nan piso sa ila mga pasahero.An mga rehiyon na gitugutan sa ltfrb amo lamang an Region 2, 3, 4 ug an NCR.
Pahimangno ni Ms.Tina Cassion an Spokesperson nan DOTr Caraga na pag-may mga driver na mudugang o musukot nan pamasahe pwede ini ireklamo sa ila opisina pinaagi na sa ila hotline sanan pwede isab sa LTFRB hotline.
Hinuon, tagpasabot ni Cassion na posible gihapon na mutaas an presyo sa pamasahe dire sa Caraga region kun may mga transort group parehas nan Piston, an musang-at nan petisyon sa ila opisina kalabot na sa fare hike o dugang na pamasahe.
Dugang ni Cassion, na inin pagfile nan petisyon muagi nan comittee hearing, na amoy magtuki sa amo na proposal.
Kay gani, sugod pa an 2008 an katapusan na misaka an fare matrix o taripa sa mga sakyanan, 10 ka tuig na an nakalabay.
Giawhag ni Cassion an mga transport group sa entiro caraga apil an Surigao City na mupadangat nan sakto na filing of fare increase sa ila opisina pero inin proposal an balansihon pa nan ila opisina para dili maapektohan pagdajaw an habig sa mga drivers sanan mga pasahero.
An region 13 taglangkoban nan lima ka probinsya parehas nan Agusan Del Sur, Agusan Del Norte, Dinagat Island, Surigao del Sur sanan Surigao del Norte. (RadyoMaN Winston Ensomo)
