General Santos City—Gipailawom karon sa operasyon sa Mindanao Medical Center ang biktimang si Roger Paruheman, 56 anyos, minyo nga residente sa Purok Villanueva Brgy Calumpang dakbayan sa Gensan human kining gipuspusan dayon gidunggab sa iyang kainom nga si Stephen Ygonia.
Sa impormasyong nakalap gikan sa maong balay tambalanan, alas 5:00 pasado sa hapon nakig-inom ang biktima uban ang suspek sulod sa gibantayan niining compound sa Brgy Apopong nga panag-iya sumala pa ni Congressman Ruel Pacquiao.
Dihang nangahubog na nagbinggkil matud pa ang biktima ug ang suspek hangtud nga gipunit sa suspetsado ang botelya sa ilang giinom ug gipuspos sa ulo sa biktima.
Human nga nabuak ang botelya gilayon usab niining gidunggab ang biktima igo sa walang bahin sa iyang kilid.
Gilayon nga gitabangan pagdala sa balay tambalanan ang biktima samtang wala pa nasayri karon hain na ang suspetsado. Nagpadayon karon ang imbestigasyon sa Makar Police Station kabahin sa maoing panghitabo.
