General Santos City—gituohang gilabay sa wala pa mailhing mga suspek ang usa ka care taker ug luna sa sagbutan nga bahin sa may Prk. Shuttle, Barangay San Jose Gensan, kilid lang sa Dole Phil Plantation sa maong lugar.
Biktima nailhang si Raul Senal y Hasuan, 42, care taker sa Brizuela Farm nga nahimutang sa Prk. Maligaya, Barangay Fatima, Gensan ug lumad nga residenti sa Barangay Lumakil, Polomolok, South Cotabato.
Alas 11:40 ang takna sa buntag, Byernes, July 7, 2017 dihang nahidangat sa buhatan sa Fatima Police Station ang usa ka Jolito Ligarte, 34, mag-uuma residenti sa samang lugar aron ireport ang bahin sa nakaplagan niining patayng lawas kilid sa Dole Phil Plantation kansa naputos ug malong.
Gilayon nga girespondihan ang maong lugar kung asa positibo nga duna gyoy patayng lawas nga anaa na ilawom sa state of decomposition.
Subay sa imbistigasyon nga gipahigayon sa SOCO pinaagi ni Police Chief Inspector Renato Maliwat, nasuta nga adunay mga samad tinigbasan ang nahisgutang biktima sa nagkandaiyang parti sa kalawasan, putol usab ang tuo nga bahin sa iyang kamot.
Samtang sa imbistigasyon sa Kapulisan sa pagpanguna ni Police Chief Inspector Nestor Maderse Jr., Chief Of Police sa Fatima Police Station nasuta nga posibling didto gipatay ang biktima sa gipuy-an niini sa Prk. Maligawa human nakit-an ang mga asik sa dugo sa nahisgutang biktima.
Tua usab narekober ang lagaraw nga gituohang gigamit sa suspek sa pagpatay sa nahisgutang biktima.
sa karon nagpadayon ang gihimong imbistigasyon sa kapulisan kalabutan sa insidenti, duna na silay gitan-aw nga person of Interest apan wala silay Eye Witness.
tags: Estacion Siete, GSCPO, General Santos, Rmn Gensan, Bryan OƱate, Inah Daven,
