iFM Laoag – Napintas a damag kadagiti arapaap da ti agturong a mapan agtrabaho idiay South Korea.
Inpakaammo ni Mrs. Anne Marie Lizette B. Atuan, manager ti Public Employment Service Office ti gobierno probinsial nga adda ti maysa nga eskuela nga umay mangisayangkat ti “career orientation”.
Inlawlawagna a mangipaay ti KRT International Inc. ti “training” mainaig iti kultura ti Korea pakairamanan ti pannakaisuro ti lengguahe wenno pagsasao ti Korea.
Imbatadna a napili ti nasao nga eskuela ti probinsia nga umay pangisayangkatan ti orientation gapu iti agdindinamag a kinalaing ken kinagaget dagiti Ilocano.
Segun ken ni Atuan, maiyuswat ti nasao nga orientation iti auditorium ti kapitolio probinsial intono Mayo 29 manipud iti alas nuebe ti bigat agingga ti alas dose ti aldaw.
Innayonna a ti nasao nga orientation ket silulukat para iti asino man, adda man iti kolehio, nagturpos iti senior high school wenno nagturposen ti kolehio ken uray dagiti agbirbiruk ti pagtrabahoan.
Nupay kasta, inbunannagna a limitado laeng ti “slot” rason a kadagiti interesado ket mabalin da ti mapan agpalista iti PESO.
Mangnamnama ni Atuan a dakkel daytoy a mangsuporta iti kalikagum ni Gob. Imee Marcos a maipaayan ti nasayaat a pagtrabahoan dagiti umili ditoy probinsia gapu ta ti nadakamat nga eskuela ket accredited pay iti Phil. Overseas Employment Administration.
Bernard Ver, RMN News
