President, Roxas – Wala na sang kabuhi sang nasapwan ang caretaker sang manokan sa Barangay Ibaca, President Roxas, Capiz.
Ginkilala ang biktima kay Jimmy Boy Perez, 21 anyos kag residente sang nasambit nga lugar.
Ba-se sa inisyal nga imbestigasyon sang mga kapulisan, nadiskubrehan sang tag-iya sang manokan nga si Relin Bunayon ang biktima nga nagahamyangon kag nagapaligo sa kaugalingon nga dugo. Nakita man diri ang pilas sang biktima sa idalom sang iya nga baba.
Gilayon nga gindala sa Bailan District Hospital ang biktima apang gindeklarar nga dead on arrival sang attending physician.
Narekober sang mga kapulisan sa ginluntaran sang insidente ang isa ka .38 caliber revolver nga may yara sang tatlo ka mga bala.
Magluwas diri nakita man ang isa ka basiyo sa sulod sang cylinder sang nasambit nga armas luthang kum sa diin ang slug sini amo ang ginapatihan nga nakaigo sa biktima.
Tatlo ka mga angulo ang ginalantaw sang mga kapulisan sa kamatayon ni Perez. Una, may responsable sa pagluthang sa biktima. Ikaduha, ang ginaalegar nga accidental firing kag ang ikatatlo, ginluthang sang biktima ang iya nga kaugalingon.
